The boys learn the song

प्राप्तराज्यस्य रामस्य वाल्मीकिर् भगवान् ऋषिः ।
चकार चरितं कृत्स्नं विचित्रपदम् आत्मवान् ॥

prāptarājyasya rāmasya vālmīkir bhagavān ṛṣiḥ
cakāra caritaṃ kṛtsnaṃ vicitrapadam ātmavān

तस्य चिन्तयमानस्य महर्षेर् भावितात्मनः ।
अगृह्णीतां ततः पादौ मुनिवेषौ कुशीलवौ ॥

tasya cintayamānasya maharṣer bhāvitātmanaḥ
agṛhṇītāṃ tataḥ pādau muniveṣau kuśīlavau

कुशीलवौ तु धर्मज्ञौ राजपुत्रौ यशस्विनौ ।
भ्रातरौ स्वरसंपन्नौ ददर्शाश्रमवासिनौ ॥

kuśīlavau tu dharmajñau rājaputrau yaśasvinau
bhrātarau svarasaṃpannau dadarśāśramavāsinau

स तु मेधाविनौ दृष्ट्वा वेदेषु परिनिष्ठितौ ।
वेदोपबृह्मणार्थाय ताव् अग्राहयत प्रभुः ।
काव्यं रामायणं कृत्स्नं सीतायाश् चरितं महत् ।
पौलस्त्यवधम् इत्य् एव चकार चरितव्रतः ॥

sa tu medhāvinau dṛṣṭvā vedeṣu pariniṣṭhitau
vedopabṛhmaṇārthāya tāv agrāhayata prabhuḥ
kāvyaṃ rāmāyaṇaṃ kṛtsnaṃ sītāyāś caritaṃ mahat
paulastyavadham ity eva cakāra caritavrataḥ

पाठ्ये गेये च मधुरं प्रमाणैस् त्रिभिर् अन्वितम् ।
जातिभिः सप्तभिर् बद्धं तन्त्रीलयसमन्वितम् ॥

pāṭhye geye ca madhuraṃ pramāṇais tribhir anvitam
jātibhiḥ saptabhir baddhaṃ tantrīlayasamanvitam

हास्यशृङ्गारकारुण्यरौद्रवीरभयानकैः ।
बीभत्सादिरसैर् युक्तं काव्यम् एतद् अगायताम् ॥

hāsyaśṛṅgārakāruṇyaraudravīrabhayānakaiḥ
bībhatsādirasair yuktaṃ kāvyam etad agāyatām

तौ तु गान्धर्वतत्त्वज्ञौ मूर्च्छनास्थानकोविदौ ।
भ्रातरौ स्वरसंपन्नौ गन्धर्वाव् इव रूपिणौ ॥

tau tu gāndharvatattvajñau mūrcchanāsthānakovidau
bhrātarau svarasaṃpannau gandharvāv iva rūpiṇau

रूपलक्षणसंपन्नौ मधुरस्वरभाषिणौ ।
बिम्बाद् इवोद्धृतौ बिम्बौ रामदेहात् तथापरौ ॥

rūpalakṣaṇasaṃpannau madhurasvarabhāṣiṇau
bimbād ivoddhṛtau bimbau rāmadehāt tathāparau

तौ राजपुत्रौ कार्त्स्न्येन धर्म्यम् आख्यानम् उत्तमम् ।
वाचो विधेयं तत् सर्वं कृत्वा काव्यम् अनिन्दितौ ॥

tau rājaputrau kārtsnyena dharmyam ākhyānam uttamam
vāco vidheyaṃ tat sarvaṃ kṛtvā kāvyam aninditau

महात्मानौ महाभागौ सर्वलक्षणलक्षितौ ।
तौ कदा चित् समेतानाम् ऋषीणां भावितात्मनाम् ।
आसीनानां समीपस्थाव् इदं काव्यम् अगायताम् ॥

mahātmānau mahābhāgau sarvalakṣaṇalakṣitau
tau kadā cit sametānām ṛṣīṇāṃ bhāvitātmanām
āsīnānāṃ samīpasthāv idaṃ kāvyam agāyatām

तच् छ्रुत्वा मुनयः सर्वे बाष्पपर्याकुलेक्षणाः ॥

tac chrutvā munayaḥ sarve bāṣpaparyākulekṣaṇāḥ

प्रविश्य ताव् उभौ सुष्ठु तदा भावम् अगायताम् ।
सहितौ मधुरं रक्तं संपन्नं स्वरसंपदा ।
एवं प्रशस्यमानौ तौ तपःश्लाघ्यैर् महर्षिभिः ।
संरक्ततरम् अत्यर्थं मधुरं ताव् अगायताम् ॥

praviśya tāv ubhau suṣṭhu tadā bhāvam agāyatām
sahitau madhuraṃ raktaṃ saṃpannaṃ svarasaṃpadā
evaṃ praśasyamānau tau tapaḥślāghyair maharṣibhiḥ
saṃraktataram atyarthaṃ madhuraṃ tāv agāyatām

प्रीतः कश् चिन् मुनिस् ताभ्यां संस्थितः कलशं ददौ ।
प्रसन्नो वल्कलं कश् चिद् ददौ ताभ्यां महायशाः ॥

prītaḥ kaś cin munis tābhyāṃ saṃsthitaḥ kalaśaṃ dadau
prasanno valkalaṃ kaś cid dadau tābhyāṃ mahāyaśāḥ

अन्यः कृष्णाजिनम् अदाद् यज्ञसूत्रं तथापरः ।
कश् चित् कमण्डलुं प्रादान् मौञ्जीम् अन्यो महामुनिः ।
बृसीम् अन्यस् तदा प्रादात् कौपीनम् अपरो मुनिः ।
ताभ्यां ददौ तदा हृष्टः कुठारम् अपरो मुनिः ।
काषायम् अपरो वस्त्रं चीरम् अन्यो ददौ मुनिः ।
जटाबन्धनम् अन्यस् तु काष्ठरज्जुं मुदान्वितः ।
यज्ञभाण्डम् ऋषिः कश् चित् काष्ठभारं तथापरः ।
औदुम्बरीं बृसीम् अन्यः स्वस्ति के चित् तदावदन् ।
आयुष्यम् अपरे प्राहुर् मुदा तत्र महर्षयः ।
ददुश् चैवं वरान् सर्वे मुनयः सत्यवादिनः ॥

anyaḥ kṛṣṇājinam adād yajñasūtraṃ tathāparaḥ
kaś cit kamaṇḍaluṃ prādān mauñjīm anyo mahāmuniḥ
bṛsīm anyas tadā prādāt kaupīnam aparo muniḥ
tābhyāṃ dadau tadā hṛṣṭaḥ kuṭhāram aparo muniḥ
kāṣāyam aparo vastraṃ cīram anyo dadau muniḥ
jaṭābandhanam anyas tu kāṣṭharajjuṃ mudānvitaḥ
yajñabhāṇḍam ṛṣiḥ kaś cit kāṣṭhabhāraṃ tathāparaḥ
audumbarīṃ bṛsīm anyaḥ svasti ke cit tadāvadan
āyuṣyam apare prāhur mudā tatra maharṣayaḥ
daduś caivaṃ varān sarve munayaḥ satyavādinaḥ

ऋषीणां च द्विजातीनां साधूनां च समागमे ।
यथोपदेशं तत्त्वज्ञौ जगतुस् तौ समाहितौ ॥

ṛṣīṇāṃ ca dvijātīnāṃ sādhūnāṃ ca samāgame
yathopadeśaṃ tattvajñau jagatus tau samāhitau